ກອງ​ປະຊຸມ​ໃຫຍ່ຜູ້​ແທນ​ທົ່ວ​ປະ​ເທດ ຄັ້ງ​ທີ IX ຂອງ​ພັກ​ປະຊາຊົນ​ປະຕິວັດ​ລາວ ​ໄດ້​ໄຂ​ຂຶ້ນ​ຢ່າງ​ເປັນ​ທາງ​ການ​ໃນ​ວັນ​ທີ 17-21 ມີນາ 2011 ທີ່​ນະ​ຄອນ​ຫຼວງວຽງຈັນ. ​ໂດຍ​ມີ​ຜູ້​ແທນ​ສົມບູນ​ເຂົ້າ​ຮ່ວມ 576 ສະຫາຍ​ທີ່​ເປັນ​ຕົວ​ແທນ​ໃຫ້​ແກ່​ສະມາຊິກ​ພັກ​ທັງ​ໝົດ​ໃນ​ຂອບ​ເຂດ​ທົ່ວ​ປະ​ເທດ 191,700 ສະຫາຍ ​ແລະ ​ແຂກ​ຖືກ​ເຊີນ​ເຂົ້າ​ຮ່ວມ​ເປັນ​ກຽດ. ຄະນະ​ປະທານ​ປະກອບ​ມີ​ສະຫາຍ​ ຈູມ​ມະ​ລີ ​ໄຊ​ຍະ​ສອນ, ​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ​ປະຊາຊົນ​ປະຕິວັດ​ລາວ, ປະທານ​ປະ​ເທດ​ແຫ່ງ​ສປປ ລາວ ພ້ອມ​ດ້ວຍ​ບັນດາ​ສະຫາຍ​ກຳມະການ​ກົມ​ການ​ເມືອງ​ສູນ​ກາງ​ພັກ, ບັນດາ​ຜູ້​ຕາງໜ້າ​ອົງການ​ຈັດ​ຕັ້ງ​ມະຫາຊົນ​ຂັ້ນ​ສູນ​ກາງ ​ແລະ ຕົວ​ແທນ​ວິລະ​ຊົນ​ແຫ່ງ​ຊາດ. ກອງ​ປະຊຸມ​ໄຂ​ຂຶ້ນ​ພາຍ​ໃຕ້​ຄຳ​ຂວັນ “​ເພີ່ມ​ທະວີ​ຄວາມ​ສາມັກ​ຄີ​ເປັນ​ປຶກ​ແຜ່ນ​ທົ່ວ​ປວງ​ຊົນ​ລາວ ​ແລະ ຄວາມ​ເປັນ​ເອກະ​ພາບ​ພາຍ​ໃນ​ພັກ, ​ເຊີດ​ຊູ​ບົດບາດ ​ແລະ ຄວາມ​ສາມາດ​ນຳພາ​ຂອງ​ພັກ, ສ້າງ​ບາດກ້າວ​ບຸກທະລຸ​ໃນ​ການຈັດ​ຕັ້ງ​ປະຕິບັດ​ແນວທາງ​ປ່ຽນ​ແປງ​ໃໝ່, ສ້າງ​ພື້ນຖານ​ອັນໜັກແໜ້ນ​ໃນ​ການ​ນຳ​ເອົາ​ປະ​ເທດ​ເຮົາ​ຫຼຸດ​ພົ້ນ​ອອກ​ຈາກ​ຄວາມ​ດ້ອຍ​ພັດທະນາ​ໃນ​ປີ 2020 ​ແລະ ສືບ​ຕໍ່​ກ້າວ​ຂຶ້ນ​ສູ່​ຈຸດໝາຍ​ສັງຄົມ​ນິຍົມ”.
ພາຍຫຼັງ​ດຳ​ເນີນ​ກອງ​ປະຊຸມຢ່າງ​ເປັນ​ທາງ​ການ​ເມື່ອ​ວັນ​ທີ 17 ມີນາ 2011 ມາ​ຮອດ​ຕອນ​ ບ່າຍ​ຂອງ​ວັນ​ທີ 21 ມີນາ 2011 ກອງ​ປະຊຸມ​ດັ່ງກ່າວ​ກໍ່​ໄດ້​ສິ້ນ​ສຸດ​ລົງ​ດ້ວຍ​ຜົນສຳ​ເລັດ​ອັນ​ຈົບງາມ, ​ໂດຍ​ມີ 61 ສະຫາຍ ຖືກ​ເລືອກ​ຕັ້ງ​ເປັນ​ຄະນະ​ບໍລິຫານ​ງານ​ສູນ​ກາງ​ພັກ ປປ ລາວ ສະ​ໄໝ​ທີ IX. ກອງ​ປະຊຸ​ໃຫຍ່​ປະຖົມມະ​ເລີກ ​ໄດ້​ເປັນ​ເອກະສັນ​ຄັດ​ເລືອກ​ເອົາ ສະຫາຍ ​ຈູມມະ​ລີ ​ໄຊ​ຍະ​ສອນ ​ເປັນ​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ, 11 ສະຫາຍ​ເປັນ​ກຳມະການ​ກົມ​ການ​ເມືອງ​ສູນ​ກາງ​ພັກ ​ແລະ 9 ສະຫາຍ​ເປັນ​ຄະນະ​ເລຂາທິການ​ສູນ​ກາງ​ພັກ (www.na.gov.la).